【男人更年期,您啲FD有無咁嘅問題?】

女人:「喂,星期六上嚟食飯,記得買手信呀﹗」

男人:「你阿媽更年期,我買兩公升「奶奶口服液」畀佢啦,免得我次次上到嚟都開我波﹗」

女人:「唔駛啦,佢去咗旅行,得返老豆係屋企,不過佢都更年期架啦﹗」

男人:「吓?男人都有更年期?咁要食啲咩架?」

女人:「男人更年期,食乜都補唔返架啦,你陪佢落街吹下水跑下步仲好啦。」

到底係咪真係有「男人更年期」?究竟係乜東東?等小編話過你知啦﹗

女人有女性荷爾蒙,男人有男性荷爾蒙,而男性荷爾蒙主要成份係由睪丸胴。男性荷爾蒙係男性體內,唔同時期都會有唔同嘅高峰期;出世前男嬰嘅男性荷爾蒙會偏高一啲啲,咁係因為要做性別嘅分化;出世之後嘅一段時間男仔女仔嘅性別區分不太明顯,男性荷爾蒙無乜特別變化。一直去到青春期,男性荷爾蒙開始再上升,第二性徵逐漸明顯(例如:有喉核、生鬍鬚、亦都開始會勃起、有性衝動等等)。係呢個時候男性荷爾蒙會持續上升,一直去到30歲左右,男性荷爾蒙就達到最高峰。而往後年紀則會以每年2%嘅比例逐年下降,大約去到4、50歲時,就開始會自覺有男性荷爾蒙不足嘅感覺。呢個時候,壯男就會容易變咗個「佬」,身體中間嘅肌肉群因為男性荷爾蒙不足,開始出現中央肥胖、大肚腩、肌肉鬆弛等現象。係內在方面,個人會變得無乜動力、唔多想郁、運動力大不如前、體力肌力無以前咁勁、甚至連上進心、性慾都出現下降嘅情況。

可以理解到:男性荷爾蒙係會影響男性夠唔夠Man同夠唔夠男人嘅一個內分泌指數,男人嘅男性荷爾蒙充足嘅話,能夠刺激到肌肉、骨骼、毛髮及性器官嘅發展,亦都係活力嘅來源;但如果不足嘅話,就有可能出現無乜活力、體能衰退、性功能障礙等現象,有好多時,房事不暢,男人有心無力,甚至無心無力,就算起到頭都好快軟,或者唔夠硬,呢個亦可以係男性荷爾蒙不足而引發。就即係「男性更年期」嘅表現。

要知道自己嘅男性荷爾蒙夠唔夠,唔係只係靠睇嘅。美國聖路易大學嘅約翰﹒莫利博士( John E.Morley)就設計份表,比師兄們去檢視一下自己有無出現呢啲情況。除咗做問卷外,另一項就係直接檢查血液入面嘅睪丸胴指素有幾多,一般而言,抽血檢查結果如果睪丸胴低於標準值〈濃度低於10.5 nmol/L ( 300 ng/dL)〉,醫生就會判定為男性荷爾蒙不足。

咁判定為「男性荷爾蒙」不足之後點呀?飲「爺爺口服液」嗎?

非也﹗男性荷爾蒙不足,經醫生評估後情況如果係嚴重嘅,佢係會開啲男性荷爾蒙補充劑您地食,但切記一定唔可以亂食,事關男性荷爾蒙補充劑過量係會促進前列腺癌加劇(如果有嘅話)及男性女乳症(俗稱:瘦底肥仔波現象)。總之,男性荷爾蒙要補幾多,是要由專科醫師依據您嘅年齡、體內男性荷爾蒙仲有幾多等因素進行衡量與控制。過少,男性嘅精氣神不足,缺乏啟動機能嘅動力;過多,又會容易造成暴力傾向。因此,補充劑量一定要拿捏得好準確呢。

咁唔想睇醫生住,睇下自己搞唔搞得掂又得唔得先?

想自己搞掂,就要先了解一下點解您嘅男性荷爾蒙會不足,有啲原因有時係無得搞架﹗

第一:老化

人體內分泌腺激素可以讓我地嘅生理保持平衡狀態,但呢個調節能力係會隨著年齡增長而慢慢失調,通常呢個過程同體質或者係遺傳有關,有人快、有人慢嘅。

第二:工作壓力

長期處於緊張忙碌嘅環境中,或者係唔好嘅家庭關係/伴侶關係,或者係飲食、作息唔正常,係容易造成激素分泌紊亂,從而引發內分泌失調。

第三:酒精

雖然有人話飲酒係可以助性,但其實酒精係會抑制下視丘及腦垂腺,減低荷爾蒙分泌,而且亦會造成肝臟傷害,同埋會唔記得做安全性行為添。因此,成日飲酒應酬果啲人,可能已經出現緊內分泌失調嘅問題,甚至可能會造成性功能障礙。

第四:外部環境因素

例如幼年時期經常接觸環境荷爾蒙者,或是看太多黃片被刺激過度,可能會造成性早熟,亦會引發內分泌失調。

坊間就有好多人話「以形補形」食多兩粒雞子就乜都返晒嚟,其實係食療上面可以吸引到嘅男性荷爾蒙係好微量,分分鐘食到您膽固醇過高都幫唔到你起頭,計小編話齋,多做運動、均衡飲食、唔煙唔酒唔宵夜、排走壓力來源,您嘅荷爾蒙就自然會返返嚟啦﹗

#男性荷爾蒙不足 #不舉 #咪亂食補充劑呀