「有種部隊」附屬於「關懷愛滋」轄下嘅男士健康團隊,專些牙性健康同埋預防愛滋病資訊,同巴打齊齊長知識。工作內容包括實地外展、網上外展、合作伙伴計劃同埋免費愛滋病梅毒快速測試服務。

實地外展


作為真.香港人,我哋認為實地外展係最直接可以了解到巴打實際需要嘅重要渠道。我哋會到巴打集中嘅地方派安全套、分享性健康知識同埋提供愛滋病預防資訊。除咗會同地盤師兄、跨境司機、的士司機吹吓水聯誼下之外,亦會定期到娛樂場所如一樓一同埋酒吧等玩吓小遊戲,摸吓酒杯底,以生動、貼近生活嘅方法同大家講吓安全啪啪啪同愛滋病測試嘅重要性,務求大家玩得暢快、玩得放心。



網上外展


「有種部隊」深明網絡媒體嘅影響力, 2006年開始進駐唔同嘅成人網站同埋交友Apps,又拓展Facebook專頁「有種部隊」,了解吓網民同村民嘅諗法,同巴打同聲同氣。我哋透過唔同媒介,例如文字、改圖、短片、網上活動同埋大型專題等,赤裸裸咁同大家 9 up 吓性健康,拆解有關愛滋病性病嘅疑問同埋迷思,將正確嘅性健康同安全啪啪啪資訊廣傳比各位巴打。


Facebook:有種部隊 Guts Army


Youtube:有種部隊 Guts Army


合作伙伴計劃


「有種部隊」積極同外界不同團體及同埋機構合作,如非牟利機構、酒吧、成人玩具店、時鐘酒店等,藉一系列教育講座及推廣活動,將多元化嘅性健康資訊帶俾參與嘅巴打,加強佢哋對性健康嘅關注同認識。過往舉辦過地盤大型工作坊、古法手作安全套工作坊、性玩具遊學團、與彩美旬果談性等活動。




講座/工作坊主題內容
認識愛滋病及性病 • 愛滋病是甚麼 – 認識愛滋病病理、病徵、預防及治療方法
• 認識其他性病的病徵、治療及預防方法
• 正確使用安全套
破解愛滋病迷思及反標籤• 愛滋病是甚麼 – 認識愛滋病病理、病徵、預防及治療方法
• 拆解常見迷思
• 講解負面標籤所引起的後果
古法手作安全套工作坊• 講解安全套有趣歷史及生產過程
• 手動製作
• 討論安全套的迷思
• 正確使用安全套
• 深入了解安全套的種類、作用及注意事項



如果有興趣同我哋合作、搞搞新意思,隨時聯絡我哋:
電話: 2394 6677
WhatsApp: 6387 5551
Email: men@aidsconcern.org.hk


講座/工作坊


除咗積極同友好團體及同埋機構合作之外,「有種部隊」仲會自發舉辦唔同主題嘅正面性教育活動、講座及工作坊,等多啲癡男怨女都有機會參與。喺傳統文化影響底下,性仍然都係禁忌,仍然都係講不出聲。但係越禁就越會好奇,與其怕怕醜醜又心思思,不如大家一齊探究下,擁抱自己嘅性慾同性幻想,自由奔放咁享受性嘅歡愉。




分類講座/工作坊主題內容
學術中醫壯陽講座
【我很醜,但我很持久】
• 中醫角度調理及養生
• 壯陽理念、食療及運動
• 中醫角度處理性病
• Q&A
精神健康講座-身心症
【做乜諗嘢】
• 精神科醫生講授焦慮症及身心症
• 症狀、求助及治療
• 常見情況、日常簡單練習
• 作為照顧者
• Q&A
性歡愉學術討論/研習課• 講解理念
• 所謂性歡愉及現況
• 認識身體結構及敏感帶
• 溝通及知情同意
• 前中後技巧(男體、女體)
• 高潮、G點、破處等常見迷思
• 性愛職安健
男士手機攝影秘笈
【我女朋友話我影到佢又肥又矮】
• 攝影入門
• 基本技巧
• 必殺絕技
• 真人練習
實踐床上技巧增值 –兩性關係篇
【家家有本淫賤的經】
• 由性治療師講解溝通技巧
• 溝通地雷
• 真人示範及練習
床上技巧增值 – 情趣用品篇
【今晚扑嘢夜唔夜?】
• 由情趣用品店負責人講解情趣用品種類及功能
• 為何及如何選擇情趣用品
• 使用須知及事後清理
• 入門前溝通、常見問題分享
BDSM101• 由專業級導師講授理念
• BDSM中的關係、界線及限制
• 知情溝通及保密
• 認識工具、操作及安全指引
• 基本技巧體驗
• 真人示範(按情況)



網上諮詢及風險評估


由2017年4月起,「有種部隊」新增咗網上諮詢及風險評估服務,師兄弟可以透過WhatsApp、Telegram、WeChat、Facebook inbox搵到我哋,查詢同愛滋病/性病有關嘅問題,了解下自己嘅感染風險,抒緩下緊張擔憂嘅心情。


Whatsapp: 6387 5551
Telegram ID: menhk9up
Wechat: loveAngel1202
Facebook: 有種部隊 Guts Army


免費愛滋病梅毒快速測試服務


測試服務係「關懷愛滋」推行愛滋病預防工作嘅重要一環,而「有種部隊」亦積極配合推廣及早測試。所有測試服務絕對免費、不記名及保密,仲會提供埋輔導、轉介服務。我哋亦會去勻港九新界提供流動測試,等你慳返時間同車錢。


睇咗咁多,係咪好想即刻做個測試呢?計過度過,90日空窗期之後,就可以直接走上嚟我哋中心做測試架啦!唔洗預約、每日派籌。
星期一至五派籌時間:
下午1:45 及 下午6:45


地址:九龍佐敦庇利金街14-20號富利商業大廈3樓B室 


(開放時間或因公眾/內部活動有改動,請留意有種部隊Guts Army Facebook更新。)


免費輔導及轉介服務


透過網上諮詢服務,我們注意到部分男士因低風險性行為而出現高焦慮的情況,甚至萌生過自殺念頭,團隊就此情況發展出情緒輔導服務。我哋會為有需要人士提供4節免費輔導,每節1小時,全程保密,並由專業輔導員或社工跟進。專門處理因性病而引起的焦慮情況、親密關係中的困擾、性功能障礙及成癮問題。
如果呢啲服務均未能支援到你嘅需要,我哋亦會為你轉介至適合嘅專科。另外,我哋都會按需要為感染者提供陪診及接送,以鼓勵感染者及早治療。


此項目/計劃由愛滋病信託基金贊助。本網頁的內容並不代表愛滋病信託基金的立場。